FSTC se 2025 Kennisgewing (weer 'n BEE bluf)

Die Finansiële Sektor Transformasieraad (FSTC) het weereens 'n opportunistiese rapporteringskennisgewing uitgereik wat oënskynlik BEE-nakomingsdokumentasie van alle finansiële instellings eis.

Sakeliga wil finansiële diensverskaffers (FSP's) herinner dat die FSTC nie die regsgesag het om sodanige verslagdoening af te dwing nie, soos duidelik blyk uit die FSTC se antwoord op ons PAIA-versoek.

FSP's moet van die volgende kennis neem:

1. Daar bestaan geen wetlike verpligting vir FSP's wat nie aan BEE deelneem nie om aan die FSTC se BEE-verslagdoeningseise te voldoen nie.

2. Versuim om op die FSTC se jaarlikse BEE-rapporteringskennisgewings te reageer en versuim om verkrygingsteikens soos uiteengesit in die 2017 Finansiële Sektorkode na te kom, is nie 'n oortreding deur FSP's van hul professionele en wetlike pligte nie.

3. Die FSTC het geen statutêre magte om sanksies op te lê vir FSP's wat nie aan BEE deelneem nie en weier om dokumentasie in te dien nie.

4. FSP's wat wél aan BEE deelneem, kan hoogstens met een BEE-vlak afgegradeer word as hulle nie betyds ‘n verslag indien nie of nie aan sekere prioriteitselement-tellings van die Sektor-kode voldoen nie.

5. Inligting wat aan die FSTC voorgelê word, kan moontlik in die toekoms teen instellings gebruik word; instellings moet noukeurig oorweeg of vrywillige openbaarmaking in hul belang is.

6. Die koste van BEE-nakoming, insluitend verifikasiefooie, die administratiewe las en die strukturele verwringings wat BEE meebring, val op besighede wat kies om deel te neem.

Sakeliga se aanbeveling:

Verskeie besighede wat nie aan BEE deelneem nie, het aan ons gerapporteer dat die FSTC nie teen hulle opgetree het nie, selfs al het hulle die FSTC se soortgelyke eise in vorige jare geïgnoreer of uitdruklik geweier om daaraan te voldoen.

Ons beveel daarom aan dat:

• FSP's wat nie aan BEE deelneem nie, die FSTC se rapporteringskennisgewing kan ignoreer.

• FSP's wat wél aan BEE deelneem, die afwegings van 'n moontlike BEE-afgradering deeglik oorweeg en dit te vergelyk met die morele, regs- en sakerisiko's wat nakoming van die versoek inhou.

Indien jy verdere inligting van die FSTC verlang, kan jy ons eenvoudige e-possjabloon hier gebruik. Jy kan dit na behoefte aanpas.

Derde Golf-BEE:

Die FSTC se eise is ongegrond en 'n voorbeeld van die Derde Golf-BEE, waarin reguleerders poog om hul moniteringsreikwydte uit te brei voordat hulle die bedryf se aanvanklike samewerking in 'n grondslag vir aggressiewe BEE-afdwinging omskep.

Bykomende hulpbronne:

• FSTC Rapporteringskennisgewing 01 van 2025
• Vir die FSTC se amptelike antwoorde op ons PAIA-versoeke, klik hier.