Hofbevel bring einde aan geskil oor bek-en-klouseer-entstowwe

Die Pretoriase Hooggeregshof het die skikking tussen die staat en Sakeliga, SAAI en Vrystaat Landbou oor bek-en-klouseer (BKS) ’n bevel van die hof gemaak.

Die skikkingsooreenkoms, wat op 9 Julie 2026 onderteken is, is nou as ’n bindende hofbevel bekragtig. Dit sluit die litigasie af wat Sakeliga en ons mede-applikante in Januarie 2026 begin het om staatsbelemmerings vir die private inenting van vee teen BKS en die invoer van BKS-entstowwe uit die weg te ruim.

Sakeliga spreek sy waardering uit teenoor ons litigasievennote, die talle individue, besighede en organisasies wat ondersteuning gebied het, en die minister van landbou en die betrokke staatsinstellings vir hul bydrae tot die skikking.

Hierdie gunstige uitkoms beklemtoon opnuut die waarde van litigasie as ’n gepaste meganisme vir die ordelike beslegting van spesifieke geskille in die openbare belang.

Wat die bevel beteken

Die bepalings van die skikking is met onmiddellike ingang as 'n bevel van die Hooggeregshof afdwingbaar.

Soos in die skikking van Julie ooreengekom, sal die staat die reg van eienaars en bestuurders om hul diere teen BKS in te ent, erken en ondersteun. Rekordhouding sal terselfdertyd aan die staat se vereistes vir die monitering van die voorkoms van BKS en teenmaatreëls voldoen. Die skikking bepaal ook dat geen staatsparty aanspraak mag maak op ’n uitsluitlike reg om BKS-entstowwe in te voer of te versprei nie.

Hulpbronne

• Hofbevel en Skikkingsooreenkoms